أنا من النوع اللي يحب يجرب أي موقع غريب يطيح قدامي. مرات أدخل وأقول: “وش الهبال ذا؟”، ومرات ألقى نفسي أستخدمه فعليًا بشكل يومي.
في هالمقال بأشاركك مواقع غريبة أو شكلها بسيط، بس تقدم فائدة فعلية. بعضها راح يفاجئك، وبعضها ممكن تنقذ فيه يومك.
🔹 1. Wayback Machine – موقع يرجعك بالزمن
تبغى تشوف كيف كان شكل أي موقع زمان؟
هالموقع يخزّن نسخ قديمة من المواقع من سنة 1996!
أنا استخدمته أكثر من مرة عشان أشوف تصاميم قديمة، أو أرجع لمقال انمسح من النت، وفعليًا فادني. ودخلت شفت تويتر بتصميمه القديم اول زمان
تكتب اسم الموقع
وتحدد السنة والوقت ، واستمتع
السؤال هل نخاف من كل شي نكتبه، دام كل شي محفوظ!
🔹 2. Bongo Cat – الموقع اللي يخليك تعزف بقطاوة 😹
شكلًا غريب جدًا، بس ممتع.
تضغط أزرار، والقط يعزف على الطبلة أو الكيبورد أو القيثارة.
🔹 3. Pointer Pointer – يدور المؤشر ويوريك مين يشير له 😲
تحط الماوس في أي مكان، ويجيب لك صورة شخص حقيقي يشير للمكان اللي حطيته فيه.
غريب جدًا… بس مره يضحك! ماقدر اشرحه بس جربه وتعرف شأقصد 🙂
🔹 4. Radio Garden – لف العالم واسمع إذاعاته المباشرة 🌍📻
موقع خرافي. يخليك تلف الكرة الأرضية وتسمع إذاعات محلية لأي دولة أو مدينة.
أنا شخصيًا جربت أسمع إذاعات من البحرين، أستراليا، ألمانيا… شعور كأنك هناك.
🔹 5. This Person Does Not Exist – أشخاص ما لهم وجود 😳
كل ما تحدث الصفحة، يطلع لك صورة إنسان حقيقية… بس المشكلة؟ الشخص ما له وجود!
الذكاء الاصطناعي يولّدها من الصفر.
مرعبة شوي، بس مفيدة كمصدر صور بدون مشاكل حقوق.
💭 خلاصة التجربة
أحيانًا الموقع اللي يضحكك أو تستغرب فكرته… يتحول مع الوقت لأداة مفيدة أو وسيلة إلهام.
المواقع هذي مو كلها “شغل جدي”، بس بعضها فعلاً ساعدني، أو على الأقل خلى يومي أخف.
💬 شاركني!
إذا تعرف موقع غريب ومفيد ما أحد يعرفه، عطنا إياه في التعليقات!
نخليها قائمة جماعية للمواقع اللي ما تخطر على البال بس تستحق التجربة.
